درب سان جرمان
تتشرف مدونة "المغربية " بنشر كلمات الاغنية الجديدة للفنان المغربي المتألق نعمان الحلو , والتي تحكي بعض أحوال مدينة مراكش ومعاناتها مع المستعمر الأجنبي , وظاهرة بيع الرياضات التي انتشرت كثيرا في المدينة الحمراء القديمة نتيجة ضغوطات الاغرء ات المادية المقدمة ...الأغنية تم كتابة كلماتها في شهر يناير من السنة الجارية , وهي قيد التلحين بتوقيع الملحن والمغني الرائع نعمان الحلو
http://www.nouamanelahlou.com/
الدرب اتباع
ودرب ...
كلو اتباع
اشراوه شي ناس
جاو من ورا لبحر
وعجبتهم لبلاد
وعجبوهم لعباد
وسكنو..ودكو لوتاد
مرحبا وميات آلف مرحبا
اشراو السكنات كاملين
دار وحدا بقات ليهم
احلف مولاها ما يبيع
ولا يخوي لمكان
ولو يعطيوه وزنها
ياقوت ومرجان
وبقى العربي ساكن
ابحال لغريب
فالدرب اللي كان سميتو
درب القنديل
واليوم اصبح سميتو
سان جرمان
مزيان آسيدي مزيان
اللي شرا شرا
وشرا بلحيلا
الديور اتصلحو
والدرب اتزوق بالحنة
والجير والنيلة
وتعلق علسوار
جودلخرصات كبار
وقنديل قديم دلفتيلا
وجاو لباب الدرب
وبناو فراسو باب
وحطو عليه لبواب
لابس فرجيا طويلة
بحال ألف ليلة وليلة
وبحال زمان
غرس دلحبق
وغرس دالسوسان
ورجع الدرب كيحمق
كيف بناوه جدودنا
كي خلاوه جدودنا
ارحمهم يا رحمان
حاجة وحدا تغيرات
الدرب كان سميتو
درب القنديل
واليوم اصبح اسميتو
سان جيرمان
مزيان آسيدي مزيان
العربي حلف ..ما يسمح فدارو
ولا يخوي لمكان
ولو يعطيوه وزنها
ياقوت ومرجان
الدنيا بالنسبة ليلو
عمرها ما كانت فلوس
وشان......ومرشان
زمان......
جدو كان بنى لمكان
وباه... نهار تزاد
غرس شجرة دالرمان
فوسط الدار فقلب السطوان
وكبرت الشجرة
وكبر العربي
ودار دورة الزمان
ويلا تهضر ديك الشجرة
كيفاش دار الزمان
وكيفاش داق العربي
طعم الحاجة والبؤس
والحرمان
ويلا تهضر داك الشجرة
وتحكي وتعاود
العربي مسكين..
فالليل
غي معى راسو يتهاود
ومللي يصبح الصباح
وتشوف العربي
ديما واقف
راسو مرفوع..
بعنفوان
والله العاطي.. . والله المنان
واليوم
جاو شي ناس
من ورا لبحر
واشراو السكنات كاملين
دار وحدا بقات ليهم
احلف مولاها ما يبيع
ولا يخوي لمكان
ولو يعطيوه وزنها
ياقوت ومرجان
وبقى العربي ساكن
ابحال لغريب
فالدرب اللي كان سميتو
درب القنديل
واليوم اصبح سميتو
سان جرمان
مزيان آسيدي مزيان
كلمات ألحان وغناء :نعمان لحلو
يناير 2008