المهدي والشَّـارْيُـو

المهدي ولد الناس،واخا ماعارفش شكون والديه ، راه عايش في الزنقة ، واكل شارب ومغطي بالسما
المهدي دار كسيدة ، طاموبيلا ديكابوطابل ضرباتو وهربات
المهدي ساعة ونص وهو يتسنى فلابيلانص
لابيلانص جات والمهدي ساعتين ونص وهو فباب الصبيتار مابغاوش يدخلوه حنت ماعندو وراق
المهدي ولد الزنقة ماعندو وراق
المهدي أخيرا قبلوا يدخلوه للصبيطار ، حنت جاه نزيف حاد
المهدي مابقاش كيمشي ، مهرس فظهرو ، لقا طبيب ولد الناس قال ليه خاصاه عملية للظهر باش يولي يقدر يتحرك
خاص العملية تكون في اسرع وقت ممكن
المهدي خاصو يدير سكانير قبل العملية
السكانير خاصو رانديفو
واحد الفرملية بنت الناس شدات الرونديفو للمهدي
المهدي خاصو يتسنا شهر باش يدير السكانير
المهدي صبر شهر كاملو في الصبيتار ، عارف راسو ماغاديش يقدر باقي يمشي ولكن عالاقل  بالعملية يقدر يولي يقعد احسن من النعاس ديما
المهدي خاصو شاريو باش ينزل يدير السكانير
ديك الفرملية الظريفة مالقاتش الشاريو
السرفيس مافيهش شاريو
الشاريوات كاملين اللي في الصبيطار راهم مشغولين
الفرملية طلع ليها الدم ، وقررت تمشي عند مدير الصبيطار
الفرملية بانوا ليها بزاف ديال الشاريوات بميكتهم فباب ديال المدير
الفرملية فرحت وطلبت المدير باش يعطيها شاريو تنزل بيه المهدي يدير السكانير باش يدير العملية باش يولي يقعد
المدير رفض طلب الفرملية
الشاريوات صدقوا عهدة وممنوع يستعملوا حتى يفتتحوا المستعجلات الجديدة
الفرملية رجعات تتقلب على شاريو جديد
الفرملية لقات شاريو في الكولوار ، فيه راجل ميت
الفرملية دات الميت للمستودع ورجعات بالشاريو
الفرملية هبطات المهدي مع الجوج ديال العشية باش يدير السكانير
المهدي مالقاش الناس ديال السكانير
المهدي تسناهوم تال الربعة ديال العشية ، مساكن مشاو يتغداو
المهدي قالوا ليه السكانير كايديروه في الصباح ، ومادام ماجاش اذن الرانديفو مشا ليه وخاص المهدي يشد رانديفو اخر
المهدي شد رانديفو اخر ،خاصوا يصبر شهر اخر
ولكن قبل ما يكمل الشهر المستعجلات الجديدة افتتحت
والشاريوات موجودين
المهدي ممكن يلقا شاريو ملي يجي رانديفو ديال السكانير
اللي من وراه غادي تكون العملية
باش المهدي يولي يقعد
ويرجع للشارع
راه دابا ضمن خدمة جديدة
وباب الجامع الكبير راه يتسناه
المهدي تيضحك

..

Comments

[هيبو]

هل هي خواطر ممم
الحياة ل تنصف المهدي على اية حال ... هذه اعتقد لمحة عن المستشفيات في المغرب

خاسو عملية تا يموت عاد توصل نوبتو هاه يا للحياة


سلام

[marroki]

اهلا بنوفل
صدقني كنت منصفة بشكل كبير
وعالم المستشفيات فيه من العجائب والغرائب الملايين
شكر لمرورك

[نوفل]

أظن أنك كنت منصفة..الواقع أفظع بمراحل..عملت في ما مضى في مستشفى و أعرف ما يحدث هناك..دمت