28.05.09
خمس فوائد للانتخابات
.1.
وراقْ الَوسَخْ ماكاين ما اكْثر منهمْ فهَاد الأيَّامَاتْ 
.2.
البطالة كتنقص والحمد لله ، نصف شباب الحُومة الخَّدامين ولا العاطْلين وحتّى القاريِين راهُمْ مْسِيرين الحمَلاتْ والنصْف الاخر: نْصْهُم بالتخَبْيَة مع الحمَلات يَخْدَمْ والنصْ الثاني يشُوفْ ويْبَرْكَمْ. ما فيها عيب ، اللهم ولاَّ راْس الدربْ ، 100 درهم في النهار مقابل شوية ديال الدوران والغْوَاتْ راها الخير والبركة . شْحال هُوما ديَال الشَّباب تَيْغَوْتُوا على حقهُم قدَّام البرلمانات ولا مْن يسمع لِيهم .اللهم غُوتة ب 100 درهم واِيلا جابْ الله ممكن نْسَلّوا سويعات من ورَا عِين المُرشَّح وايلا كان هاد المرشح ولد الحلال ، غادي يَخْدَمْنَاااااااااااا ويْخَدَّمْنَا بعدما يربح وايلا ما طْمَرْشْ فيه غْواتْنَا ، نجمعوا فلوس العطلة الصيفية ونحَركُوا الجيب شوية باش نشطوا الكِيفْ والعقلية
.3. اِيوا أخيرا غَادي نْرجْعُوا نشُوفوا وجه رئيس الجماعة أو البرلماني ديَالنا . راهْ توحشْنَاهْ ، مِنْ آخِر انتخاباتْ ماشْفناْه حتى قْرَّبنَا نَنْسَاوْه. ولكن تبارك الله ، بَان عْلِيهْ الخِير ، غادي وكَيْسْمَانْ وكَرْشُوا كَتْعْمَرْ ، عامل كِيفْ العجل ديال العرس ، نسمنُوه ونْوَكْلُوه ونشْربوه ولكن يْخَلَّصْ يخلَّص .4. الرواج فكلشي الحمد لله ،حمام العيالات ديما عامر ، والعريفات خدامات يهدروا على هذا وذاك : واحد بغا يخْدمنا وماقدرش هادي 300 عام ايَوا نعطيوه فرصة ولاخََْرْ جديد رشح راسو هاد العام ياكما باغي يشفَرنا ؟ .5. صلة الرحم كتنشطْ ، وفي الانتخابات حتى واحد فيها ماكَيْفَرطْ . جارة عم خال جارتكْ وجداتْ بنت عم خالتكْ ، عْمْرك ما شفتيها أو الغيبة عليها كانت هادي مُّدَة ، تجِي تزورك على غير العادة وتحْيِي معك الرِحِم، وماتنساشْ توصيك تصوتي لفلان بن فلان ، ايوا راكي عزيزة وماغَاديْش تخَيْبِي ليها الظَّن ايوا كل انتخابات وأنتم بخير
ايوا والاسواق ماكاين اكثر من الضجيج فيهم والنازل اكثر من الطالع والمحلات التجارية ديما مكْريَّة لمالين الشكَاير باش يتقربوا من السكان ويثْقبوا ليه الآذان بالهضرة على فلان وفلان
Commentaires
وتستمر المهزلة
تدوينة ساخرة جميلة تضم بين أحشائها مهزلة هذا الوطن أو بعنوان آخر
وتستمر المهزلة
@@gnawi
وتستمر المهزلة
ويستمر التدوين